*المحفظة الإلكترونية

 

فهاد الكناش غادي نشوفو المحفظة الإلكترونية المرتبطة بالعملات الرقمية المشفرة ؤ ماشي المحافظ الالكترونية ديال البنكة ديالك لي داير ف تيليفونك... 

هادشي يقدر يكون جديد بالنسبة ليك ولكن راه مهم تعرفو لأنو غادي يولي شي حاجة عادية فالمستقبل القريب…

الهاتف النقال فاش بان كنتي تاتعيط بيه للناس و تشجل فيه نميرات و داك لي كان تايطير و هوا باها تايسيفط الميساجات اس-ام -اس.. مع مرور الوقت ولينا نستعملو الهاتف بحالو بحال الحاسوب تقريبا تانديرو بيه كلشي…

علاش هاد الهدرة ؟

 

باش تعرف بان التقنية سريعة التطور و لات جزأ مهم من حياتنا اليومية ؤ بعدما ستعملنا الهاتف باش نعيطو, نسيفطو, ميساج نستعملوه كمكينة ديال لحسابو، نسيفطو التصاور نتصفحو الانترنت نتفرج فاليوتيب نصورو بيه …

جا الوقت باش نستعملوه كمحفظة نقود نخلصو بيه ؤ نتخلصو فيه... داكشي باش خاصك تعرف هادشي ديال المحافظ الالكترونية كيفاش تايخدم... خاصة المحافظ لي مرتبطة بالعملات الرقمية

اشناهوما هاد المحافظ الالكترونية ؟

تطبيق الكتروني يحمل بالمجان تاتانصطاليه ف الهاتف او الحاسوب ديالك،هاد التطبيق تايكون مرتبط  اما بالبنك ديالك او مرتبط ببنك على الانترنت (بحال بايبال مثلا) او مرتبط بموقع للعملات الرقمية او مرتبط مباشرة بشبكة من شبكات البلوكتشين... هاااا

محفظة الكترونية مرتبطة بالبنك العادي او بنك الانترنت لا تهمنا... فقط تعمدت نشير ليها باش مايوقعش ليك خلط!

اشناهوما المحافظ الالكترونية ديال العملات الرقمية لي كاينين؟

كاينين جوج نواع

واحد النوع مرتابط مباشرة بالبلوكتشين و هوما :

• 1 محفظة تاتانصطالا على الحاسوب او الهاتف

• 2 محفظة تاتانصصطالا علا الحاسوب و تكون مرتبطة بجهاز االكترونيي خارجي ( على شكل مفتاح  ) يجب ربطه بالحاسوب من اجل تشغيلها…
• 3 محفظة ورقية : هادي متاتانصطلاش ولكين تاتقدر تصايبها من خلال المحافظ لي هدرنا عليهم الفوق (1 ؤ 2)

 

واحد النوع مرتبط بوسيط تايقدم خدمات المحافظ الالكترونية على المنصة ديالو وهادو هوما لي تايتسماو:

محفظة اونلاين (لاينصح بهادا النوع من المحافظ ! دابا نڭول ليكم علاش)...مااازيان

دابا نهدرو على المحفظة لي تاتانصطالا ف الهاتف او الحاسوب:

• 1 تاتيليشارجيها من الاب سطور او ڭوڭل بلاي أو موقع البلوكتشين الرسمي تاتنصطاليها ف الهاتف او الحاسوب
• 2 ملي تاتحلها اغلب المحافظ تايطرحو عليك جوج اسئلة : 

- واش بغيتي تسترجع محفظة قديمة

- واش بغيتي تصايب محفظة اول مرة

• 3 دير بيت نصايب اول مرة...

• 4 دير سمية للمحفظة ديالك لانك تقدر تصايب بزاف ديال البزاطم بتطبيق واحد ههه دير سمية لكل بزطام باش مايتخلطو عليك لعرارم ههه

• 5 دير كلمة سرية ديالك و عقل عليها (المودباص غادي تحتاج ليه باش تصرف لفلوس من المحفظة يعني بلا بيه مايمكنش تصرف)
• Spending password

• 6 الجملة السرية او جملة إسترجاع المحفظة: Wallet recovery phrase

هاد الجملة تاتعطيها المحفظة ملي تتوصل لهاد المرحلة... خاصك تعرف بان هاد الجملة هي شيفرة سرية وفريدة من نوعها و ماكيننش منها جوج يعني ديالك بوحدك!

لدلك خصك تعامل معاها بمسؤولية تكتبها و تطبعها في نسخ عدة وتخبيها ف شي بلاصة امنة....لانك ما غاديش تحتاج ليها الا في حالة ضياع المحفظة والمهمة ديالها الحصرية هي استرجاع المحفظة...

دابا انا عندي محفظة فيها البيتكوين فالهاتف و تشفرليا او خسر ليا اش ندير؟

هانيا الا تشفر ليك الهاتف داك لي شفرو مايقدرش يستعمل المحفظة حقاش باش يستعملها و خا يدخل ليها ما يقدرش يصرف منها ايلا مكانش عند المودباص لي هدرنا عليه لفوق

لفلوس كاينة المحفظة لي فالهاتف لي تسرق او خسر يعني لفلوس مشات ؟

فالحقيقة لفلوس ما كايناش لا ف الهاتف لا ف الحاسوب ديالك لفلوس راها كاينا فالامان على البلوكشين المحفظة غير الباب ديالك لي تدخل منو نتا للبوكتشين 

كيفاش ندير تانسترجع فلوسي فمحفظة جديدة؟

• غادي تانصطالي التطبيق ديال المحفظة فالهاتف او الحاسوب الجديد
• غادي دير استرجاع المحفظة
• غادي يطلب منك الجملة السرية او جملة الاسترجاع
• غادي دخلها... غادي دير مودباص جديد وهانت رديتي فلوسك او دخلتي لحسسابك لي فالبلوكتشين من جديد...هااااا

ما مشا لا تيليفون ولا والو مشا ليا هي المودباص ديال المحفظة مابقيتش قدرت نخدم بيها؟

فهاد الحالة تحيد هداك التطبيق غادي تعاود تانصطاليه من جديد ودير نفس العملية لي هدرنا عليها الفوق…

• غادي دير استرجاع المحفظة
• غادي يطلب منك الجملة السرية او جملة الاسترجاع
• غادي دخلها... غادي دير مودباص جديد وهانتا رديتي فلوسك او دخلتي لحسابك لي فالبلوكتشين من جديد...هاااا

واش نقدر ندخل لنفس المحفظة من بزاف دالبلايص (من بزاف تالهواتف او الحواسيب) فنفس الوقت؟

لا مايمكنش!

علاش؟

لفلوس كاينين فالبلوكتشين و الجهاز لي دخلتي ليه الجملة السرية هو الوحيد لي يقدر يدخل للاموال...

غادي ناصطالي التطبيق فجهاز واحد اخور و ندخل نفس الجملة السرية؟

هااا

 لفلوس غادي تبان فالجهاز لي درتي فيه الجملة السرية اخر مرة…

هدرت فقط بتفصيل مبسط على نوع واحد من البزاطم

او المحافظ الالكترونية و هو لي مشهور نقدر ندير ليكم تكنيشة على كل محفظة والخصائص ديالها…

يمكنك تعلم بعض المبادئ الأساسية عن تقنيات البلوكشين باللغة العربية في هذا الموقع البسيط

*تنويه : التعامل بالبيتكوين والعملات الرقمية عموما ممنوع حاليا بالمملكة المغربية ! الكناش توعوي معرفي...

تحياتي