*اشناهوا البيتكوين؟

هاد ليامات غادي تبداو تقراو فالتايم لاين ديال السوشل ميديا او فالميديا بصفة عامة على البيتكوين والعملات الرقمية هادشي راه كتر من عشر سنين باش كاين غير اتمن لي تايطلع وتايلفت الانتباه ...

هدا كناش حول تقنية البلوكشين و عملة البيتكوين الرقمية، قبل ما نبدا، هاد الكناش الهدف ديالو معرفي فقط وليس دعوة للإستتمار بأي شكل من الاشكال.. ماقادين على دنوب شي واحد ههه...

قانونيا، حاليا ممنوع التعامل بالعملات الرقمية فالمغرب...

ولكن لي بغا يبحت وقرا ويتعلم متانضنش هادشي ممنوع!

ههه.. لي ممنوع هو تبيع او تشري تلفازة او دار بالبيتكوين متلا... البيتكوين هو واحد العملة تختارعات نهاية ٢٠٠٨ بداية ٢٠٠٩ من طرف واحد سما راسو ساتوشي ناكاموتو...

كان الدافع من مورا هاد الاختراع وهو خلق نظام مالي عالمي شفاف يكون بديل للنظام الحالي لي متحكمين فيه الابناك المركزية وعملة الدولار ديال ميريكان... وهاد التفكير كان صحيح ملي جات الازمة المالية عام 2008!

ولكن اشنو العلاقة والفرق لي بين عملة البيتكوين و تقنية البلوكشين؟

نبداو بالبلوكشين: البلوكشين هي واحد الطريقة جديدة لتخزين المعلومات يعني بحال التويتر و فيس بوك عندهم خوادم او سيرفورات فين مخبيين ليك تصاورك و ميساجات و حتا حياتك اليومية ههه غير الفرق هو ان تقنية البلوكشين غيرات قواعد اللعبة و عطاتك نتا بوحدك لي تقدر تحكم فمعلوماتك

ومايمكنش لتا واحد يغير ولايزيد ولا ينقص ولايستاغل المعلومات من غيرك انتا... يعني البوفوار غادي يولي عند المستخدم ماشي عند مزود الخدمة...

السمية ديال بلوكشين جات من كون ان المعلومات تاتكون مسجلة على شكل سلسلة مترابطة وتشفر باستمرار...عملية التشفير لاتتوقف فهي مرتبطة بالوقت...

البلوكشين تكون مرتبطة فيما بينها عبر حواسيب مرتبطة بالانترنت و منتشرة في جميع انحاء العالم. تتميز التقنية بالشفافية، الخصوصية، اللامركزية واستحالة تزوير المعلومات المدونة فيها...

دابا اشناهوا البيتكوين؟

البيتكوين هو برنامج الكتروني تايستاغل تقنية البلوكشين باش يسجل تبادل عملات رقمية على البلوكشين يعني ملي المعطي تايصيفط شي بيتكون لعلال البرنامج تايشجل هاد المعاملة بشكل اوطوماتيكيكي مايمكنش منبعد علال يڭول للمعطي راه ما وصلاتنيش لفلوس ههه كلشي العالم مشجلة فيه هاد المعاملة...

يمكن ليك تعتابر البيتكوين مجرد ملف او كود رقمي تايتبدلوه الناس كعملة عبر الانترنت يستحيل تزويرها او صنعها خارج قواعد النظام و هي عملة نادرة جدة و اقصى ما يمكن للنظام صنعه هو واحد وعشرين مليون عملة بيتكوين تصيبات منها طمنتاش لمليون ونص هي لي كاينة فالسوق حاليا

وما غادي تكمل هاديك الواحد وعشرين مليون بيتكوي تالعام 2141 امعلم ... يعني هادشي قليل بزاف داكشي علاش التمن ديال بيتكوين واصل دابا ل طمنطاش لمليون للعملة الواحدة ولكين كل بيتكوين فيه ميات مليون صاتوشي و هي اصغر وحدة...

واش كاين بلوكشين واحد و لا بزاف؟

كاين بزاف و كاين لي عام و كاين لي خاص ديال شركة متلا.. يمكن لاي شركة تصايب بلوكشين خاص بيها تخدم بيه ... بلوكشين تقدر تكون عندو عملة رقمية خاصة و يقدر يخدم بلا عملة...

البلوكشين ديال البيتكوين العملة لي تاتخدم فيه هي عملة البينكوين الرقمية والرمز ديالها BTC

البلوكشين ديال الايتيريوم هو بلوكشين واحد اخر متقدم على البيتكوين عندو عملة خاصة بيه سميتها الايثريوم... ETH

واش ممكن نصيفت بيتكون فالشبكة ديال ايثيريوم او العكس؟

لا، بحال ملي تدير تغريدة ف تويتر مايمكنش تبان فالفايس... كل عملة عندها الشبكة الام ديالها ولكن كاينين منصات ديال التبادل يعني تاتبيع فيهم البيتكوين باش تشري الايثيريوم مثلا او العكس...

كيفاش نقدرنصيفط او نستقبل البيتكوين؟

البيتكوين كيما ڭلنا عملة رقمية يعني كاينة بشكل رقمي فقط ومايمكنش تكون بشي شكل اخر ابدا يعني ڭاليك نبيع ليك بيتكوين دهبي او ورقي او بلاسطيكي راه بغا ينصبك ههه

البيتكوين لا تغادر شبكة البلوكشين ديال البيتكوين...هاااا

غادي تسولني كيفاش غادي يكون بيتكوين وهو ماتايخرجش من الشبكة؟

ساهلة... غادي تفتح حساب فشبكة البيتكوين و هي عملية انشاء المحفظة الرقمية بلغة العملة الرقمية..

هاد المحفظة ملي تاتصايبها تاتولي تانتا جزأ من النظام اي مرتبط بيه بواسطة المحفظة ديالك لي تايكون عندها عنوان تاتستقبل فيه لفلوس و تاتسيفط منو لفلوس هاد المحفظة فيها ديال الهاتف و ديال الحاسوب وحدين خرين اكتر تقدما لا داعي للتعمق ههه

هاد المحفظة تاتشارجا من الانترنت فابور و تاتانصطاليها متلا فالهاتف ولكين ملي تاتبغي تانصطاليها تاتعطيك واحد الجملة سرية هاد الجملة خطيرة جدا خاصك تخبيها فمكان امن ومعروف عندك و ماشي ف انترنت او فالحاسوب لا لا لا ...

خاصك تكتبها وتكون تقدر توصل ليها حقاش هي الطريقة الوحيدة لي ايلا مشا ليك الهاتف او خسر ليك الحاسوب او او هاديك الجملة السرية هي لي غادي تمكنك تعاود تدخل لحسابك لي فيه فلوسك على شبكة البيتكوين متلا...

وايلا مشات ليك مشاو ليك فلوسك وضربك التران و مستحيل ترجعهم لان النظام مصمم باش نتا بوحدك لي تحكم فالحساب ديالك ومايمكنش لشي واحد يساعدك و هادشي خطير على الناس لي ماتقدرش تحمل المسؤولية ههه اما يلا طاح ليك شي واحد على الجملة السرية ديالك او عطيتيها ليه راه بتعبير اخر عطيتيه فلوسك

علاش؟

بكل بساطة لان اي واحد طاح على الجملة السرية ديالك يكفي انو يشارجي محفظة فهاتف ديالو يدخل الجملة السرية غادي تولي المحفظة الجديدة هي لي تتحكم فالحساب والقديمة لا ...

ويقدر ڭاع يحول لفلوس لمحفظة اخرى بجملة وحدا اخرى يعني لان الفلوس كاينة فالنظام ديال البيتكوين ماشي فالهاتف او الحاسوب يعني المحفظة هي الباب و الجملة السرية هي المفتاح الوحيد و الاوحد...

واش يمكن للهاكر اختراق نظام البيتكوين و سرقة الاموال او تويلها لحسابو؟

كثر من عشر سنين والنظام خدام باقي ماقدرو يختارقوه وكل عشر دقائق يصبح اكثر صعوبة..

واش نقدر نوقف نظام البيتكوين؟

نعم!

كيفاش؟

قطع الانترنت عن العالم!

يمكنك تعلم بعض المبادئ الأساسية عن تقنيات البلوكشين باللغة العربية في هذا الموقع البسيط

*تنويه : التعامل بالبيتكوين والعملات الرقمية عموما ممنوع حاليا بالمملكة المغربية ! الكناش توعوي معرفي...

تحياتي...