الاسباب المحتملة و الغير محتملة لفشل نظام البيتكوين!

هدا كناشي على الاسباب المحتملة و الغير محتملة لفشل نظام البيتكوين!

هادشي لي فهاد الكناش رأي الزطاط لخلق نقاش حول هاد التقنيات الجديدة ؤ ماشي توجيه للإستتمار من عدمه... يمكن لاي واحد يعبر على خلاف هادشي بكل اريحية هنا فالتعليق او فحساب التويتر ديال الزطاط  zttat@

 نبداو...

البتكوين هو نظام دفع الكتروني مصايب بتقنية البلوكشين ؤ عندو عملة خاصة بيه لي هيا البيتكوين. باش تاخد نظرة عامة مبسطة سير هنا

هاد النظام منهار خرج ف 2009 ؤ هو خدام بدون توقف ؤ معمرو غلط ؤ تبت النجاعة ديالو كنظام دفع معتامد تماما على الالة... 

ولكين واش هاد النظام زعما ما عندوش نقاط ضعف ؟ 
واش يمكن  يتوفر على صفات الكمال ؟

ها نقاط الضعف!

1- التعدين

2- الهاش
3- هجوم (51%) 
4- السعر
5- الحاجة المستمرة لاستهلاك المزيد من الكهرباء
6- الحوسبة الكمية
7- الأنترنت

1- التعدين

التعدين هي العملية لي تاتأمن النظام ؤ تتخليه محمي من الاختراق.. هاد لبلان ديال التعدين تايعتامد على القوة الحاسوبية و القوة الكهربائية. وهو ما يطلق عليه (اتبات العمل proof of work)...

هادشي خلى من المستحيل على الناس العاديين يشاركو فالنظام بالحاسوب الشخصي ديالهم. الشي لي خلا الناس يشتاركو فتجمعات باش يشكلو قوة حاسوبية يقادرو ينافسو بيها فعملية التعدين التي تعتبر الطريقة الوحيدة لانتاج البيتكوين...هاااا

هاد التجمعات ادات الى تركيز عملية التعدين ف عدد قليل من التجمعات لي تايتسماو Mining pools

ؤ هادشي ضرب اللا مركزية فالزيرو... يعني النظام ما حدو تايصعاب ؤ هو تايتركز فيد  شركات كبرى ؤ تايصعاب على الصغار الشي لي يقدر ان الشبكة تقدر تسيطر عليها شي جهة او مجموعة صغيرة ؤ يقدرو يتلاعبو بيها او يطفيوها كاع!

2- الهاش

الهاش هو لي داير عليه الفيلم ديال البلوكشين و هو تقنية تشفير مشهورة ... طبعا البيتكوين معتامد على تقنية البلوكشين لي بدورها معتامدة على الهاش...

البيتكوين خدام بتقنية ٍ(SHA-256) هاد الشيفرة تا واحد مامعروف بيلا فكها او كسرها يعني ايلا كانت شي جهة قدرات تفك هاد النوع من التشفير ؤ مخبية ههه تقدر شي نهار تنوض ضرب هاد لحماق كلو ف الزيرو ههه 

حقاش غادي تزور لكتاب لي مشجلين فيه المعاملات ؤ تقدر تحل المحفظة الالكترونية ؤ تلقا الزيروات...

3- هجوم (51%) 

هو ملي غادي تنوض شي جها ما لغرض ما تجمع 51% من القوة الحاسوبية ؤ تتحكم فالشبكة و تقدر مرة مرة تتغير الاتجاه ديال لفلوس.. يعني نتا تسيفط مليار لشي شركة شريتي منها شي حاجة يمكن ايلا شي جيهة رصدات هاد المعاملة فالوقت المناسب، ؤ كانت عندها القدرة توفر كتر من 51% من القوة الحااسوبية تغير الاتجااه ديال لفلوس لشي حساب ما عندو تا علاقة بالحساب لي كانت غادية ليه لفلوس! هاد الهجمات ايلا كترو غادي تفقد التقة فالنظام ويقدر ينهار...

4- السعر

البيتكوين مصمم باش السعر ديالو ديما يبقا تايطلع مع الوقت و الصعوبة ديال التعدين تاتصعاب باش ديما يبقا ديما تبقا التكلفة ديال اي هجوم غالية بزاف بالمقارنة مع الربح لي يقدر يتحقق منن اي هجوم على الشبكة...هااا

دابا الخوف تايجي الا ناضو دوك لي عندهم بزاف ديال البيتكوين ؤ لي شراوه بجوج دريال ههه و وقعات عمليات بيع ضخمة و نهارت الاسعار شي انهيار كبير... المعدنين تايخسرو لملاين ديال الضو والماتريال و غادي يبداو تايربحو بيتكوين ما ساوي والو... طبعا غادي ينزلو الريدو وباالتالي غادي يسهال الهجوم  على الشبكة...لان انسحاب المعدنين الكبار تايعني قوة حاسوبية اقل تايعني امان اقل...

5- الحاجة المستمرة لاستهلاك المزيد من الكهرباء

البيتكوين و الانظمة لي تاتعتامد على نظام القوة الحاسوبية تاتستهلك بزاف ديال الضو...الشي لي يقدر مايكونش مستدام على المدى البعيد و يقدر يأدي لتخلي المعدنين عن عملية التعدين الشي لي غادي يضعف الشبكة...

6- الحوسبة الكمية

هو نظام حوسبة جديد يتم تطويره منذ سنوات يقدر حاسوب واحد يحسب كتر من جميع المعدنين او يقدر يكسر عملية التشفير لي كاينة فالبيتكوين ههه

7- الأنترنت

لي طفا الانترنت غادي يطفي البيتكوين!  

حاليا هادشي لي كنشت هنا هو لي بان ليا يقدر يشكل نقاط ضعف ف نظام البيتكوين... 

هدشي لي كنشت هنا يقدر يكون مجرد تخريف فيه جانب من الحقيقة بناء على عدة احتمالات ليست مستحيلة... 

ولكن خاصك تعرف ان البيتكوين نظام حي يعني في عملية تطوير و تحسين مستمرة. منهار بان و المطورين تايطورو فيه و تايحسنو فيه ؤ يقدر تستمر عملية التطوير باش تجابه التحديات المستقبلية ويقدر تنجح فمجابهة كل التحديات ؤ يقدر لا!

تحياتي...

يمكنك تعلم بعض المبادئ الأساسية عن تقنيات البلوكشين باللغة العربية في هذا الموقع البسيط

*تنويه : التعامل بالبيتكوين والعملات الرقمية عموما ممنوع حاليا بالمملكة المغربية ! الكناش توعوي معرفي...