علاش المغرب خاصو يشجع تقنيات البلوكتشين بحال البيتكوين ماشي يمنعهم؟

x

قبل من نبداو الثريد خاصكم تعرفو ان هادشي لي غادي ناقش هو مجرد وجهة نظر الزطاط المتواضعة ولا يجب اعتبارها دعوة للإستتمار او خرق للقانون! لا اتوفر على الكفاءة القانونية لي تقدر تخليني ناقش هادشي من الناحية القانونية ؤ مايمكانش ليا نفيدك فهاد الباب.

نبداو...

كنت درت هاد التويتة

@BankAlMaghrib you should realize that this crypto thing is kind of a big deal!
Blockchain protocols are part of a tidal wave of new technologies that are changing the way production and commerce are organized#Morocco should launch a digital #dirham and back it with digital gold

— الزطاطⓩ🛡 (@zttat) February 4, 2021

ڭلت فيها ان بنك المغرب ما خاصوش يتجاهل هادشي ديال البلوكتشين...هادشي ما تايعنيش انه فعلا متجاهل هادشي والله اعلم ههه ولكن من ناحية خرا راه تقنية البلوكتشين متاتعينش غير العملة الرقمية! او البيتكوين فقط.. او قطاع المال و الأبناك...

باش نحيدو اللبس اجيو نرجعو اللور بزاف اي نهار بانت الانترنت ف بداية التمانينات ف ميريكان راه كان الاستعمال ديالها محدود بجهد... ؤ نهار ولات مدنية (حقاش كانت تقنية عسكرية) كان التراسل هو اول حاجة تادير الانترنت ديك الوقت...هاااا

بدات عملية التطوير لي خلقات جوج د الانواع ديال بنادم 

بنادم لي أمن بتقنية الانترنت و استتمر فيها ؤ حتا ديك الساعة كان الريسك كبير لانك ببساطة تاتستمر ف شي حاجة غيرملموسة....

ؤكاين بنادم لي مأمنش بالانترنت ؤ كان تاتبان ليه الانترنت مجرد وسيلة اخرى للتواصل بحال الهاتف و الفاكس و كان لي كان تايتهكم عليها ڭاع بحال واحد السيد كتب مقال كل تهكم على الناس لي كانو تنبأو بهاد الانترنت لي كلكم تتعرفو ليوما وبلا ما نحتاج نڭول ليكم لاش وصلات تقنية الانترنت ههه... 

هادي نبدة من المقال ديال صاحبنا لينشرو ف صحيفة "نيوزويك" عام ١٩٩5 يعني من بعد عشر سنوات تقريبا من تعميم الانترنت (نفس اللحظة لي فيها العالم ليوما اي عشر سنين بعد اطلاق البيتكوين و معاها تقنية البلوكتشين...) 

السيد زڭلها زڭلة ديال لغدايد وڭاع داكشي لي ڭال ما غاديش يصدق راه واقع ليوما ؤ تانتعاملو معاه بشكل عادي... صاحبنا منبعد ما بنت ليه الحقيقة ڭدام عينيه اعتابر المقال كارثة مساره المهني....

هااا...

الانسان بطبعو مقاوم للتغييير و تايبقا ديما تايفضل الحاجة لقديمة لي فايت ليه مجربها...

دابا ايلا بغينا نديرو اسقاط على البيتكوين راه نفس الشكل...الناس مامأنينش بيه ؤ ما عارفينش الاهمية ديالو لانه ببساطة فلوس غير ملموسة... ؤ حتى اعتبار البتكوين مجرد فلوس راه خطأ كارتي..

المغرب منع التعامل بالبيتكوين تقريبا ف ٢٠١٧ ؤ باقي تانعقل خرج وزير الاتصال وقيلا كان ڭال منعناه لاننا معرفناش شكون من موراه و هو تبرير كلاسيكي كانو تايستعملوه بزاف د الدول لي كانو منعوه السؤال هو من بعد ما منعتوه اش درتو باش تعرفو شكون من موراه؟ شكون لي صنعو؟ كيفاش خدام؟ الله اعلم.. 

بزاف د الدول منعاه بحال الشينوا ولكن من مورا الستار الحومة الصينية متورطة فشراء البيتكوين والتعدين روسيا كان ممنوع و لا قانوني و هناك حديت عن تشجيع روسي لاستعمال بترول الشيست لتعدين البيتكوين...

نقدرو نفهمو المنع كخطوة اولى بيدما نعرفو اشكاين... ولكن تمنع ؤ ما دير والو راه تايتسما التخربيق هدا ههه

المغرب من الدول المستهلكة للتقنية يعني ماتاينتجش التقنية... ماشي هي مستهلكين راه مستهلك متأخر راه الانترنت ما تعمم غير فالسنوات الاخيرة...

ؤ بهاد المنع لي مانع العملات الرقمية راه غاد نوليو مرة خرا مستهلك متأخر لتقنية البلوكتشين و لي غادي يخلي لبلاد تخسر العملة الصعبة باش تستورد هاد التقنيات تاني!!!! (خسران العملة الصعبة كان سبب منطقي ربما للمنع)

المغرب كدولة عندها فرصة تكون رائدة خاصها تحتضن متل هاد التقنيات وتشجع على الاستتمار فيها ؤ تستاضف مؤتمرات رواد هاد التقنيات باش تخلي الشباب يحتكو بالناس لي سابقينا فهادشي راه الامر لا يتعلق بالسيادة المالية او بعملة راه تانهدرو على مجال وصل ليوما ل اكتر من ترليون دولار كرسملة... هاد القيمة ما جاتش غير بالمضاربة فقط بل جات من الافاق الجديدة لي خلقاتها التقنية و ليه خاص الدولة المغربية تعيد النظر فهاد لبلان وتحط مجموعة من القوانين لتنظيم الولوج لهاد التقنيات تعليما و استتمارا...

العملات الرقمية هو تبيق واحد من تطبيقات البلوكتشين التي يمكن الاستفادة منها في كل شيء و ستقلب الانترنت رأسا على عقب...

ڭوڭل ؤ فايسبوك اخطر على المغرب من تقنيات البلوكشين... بناء تطبيقات حكومية تعتمد على شركات اجنبية بحال ڭوڭل راه اخطر ويقدر هاد الشركات يبتزو الدولة ... نفس التطبيقات يمكن يتقادو على مصات لا مركزية و لا تتبع لاي دولة بحال الايتيريوم او كاردانو... بل يمكن بناء تطبيقات تجيب العملة الصعبة للبلاد...

علاش المغرب ما يشجعش الشركات الناشئة فالمجال؟ متلا الشركة اللي تاطور كادانو دايرة شراكة مع ايتيوبيا و تتفورمي الناس فالتقنية اش عند اتيبيا ؤ روندا ما عندناش حنا؟ ببساطة: الرؤية!

البرتغال دايرة اعفاء ضريبي لاي مستتمر او شركات لي تاتعامل بالعملات الرقمية..

مالطا قدرات تشجع شركات رائدة فالمجال بحال بينانص الصينية تحل مكاتب فيها...

المغرب خاصو يطبع مع التقنية و يخلق ليها جميع الضروف باش يخرج مجرد مستهلك متأخر للتقنية راه ملي تانشوف هاد الخريطة ؤ تانشوف الدول لي تاهوم واخدين نفس خطوة المغرب (المنع) تايضرني خاطري...

وانا تانوجد فهاد التريد نزل خبر شراء شركة تيسلا ل مليار ؤ نص ديال البيتكوين...

BREAKING: @Tesla has disclosed purchasing $1.5 billion in bitcoin.

It's also planning to accept bitcoin payments soon.

Via @Dan_Z_Palmer https://t.co/ZX1DVEy6WZ

— CoinDesk (@CoinDesk) February 8, 2021

طبعا هدا قرار استتماري ديال شركة ولكن راه تايعني بزاف...

المغرب كدولة خاصو يوفر البيئة المناسبة باش التقنيين و المستتمرين يقدرو يخدمو باش لبلاد تستافد ؤ علاش لا نكونو بلد منتج للتقنية ماش مجرد مستهلك متأخر! 

يمكنك تعلم بعض المبادئ الأساسية عن تقنيات البلوكشين باللغة العربية في هذا الموقع البسيط

والسلام عليكم و رحمة الله...