طورتشين : هجوم الاغلبية الساحقة!
طورتشين : هجوم الاغلبية الساحقة!
ثريد طويل ؤ فشكل...ايلا قريتيه متنساش شي رتويت ايلا ما قريتيهش او كنتي غير مهتم متنساش ترتويتي باش لي مهتم يستافد وشكرا!
تنبيه : هاد التريد ماشي نصيحة او تشجيع باش تدير شي حاجة...هاد التريد غير باش تعرف اش واقع فهاد المجال ؤ باش تعرف ان التقنية تحاول فقط ايجاد الحلول! الربح و الخسارة مسألة نسبية و هي مرتبطة اساسا بنجاح او فشل الحل!
نبداو
مشروع طورتشين كنت هدرت عليه فالتريد لي قبل من هدا...تقدر تمشي تقراه فكناش الزطاط باش تكون عندك فكرة علاش بيت نهدر..
المهم ان الفكرة الاساسية للمشروع هو خلق نظام لا مركزي يمكن اي انسان فينما كان فالعالم يبيع البيتكوين او غيره من العملات او يشريهم بلا مايصيفط فلوسو لمنصة تبادل العملات...
علاش؟
المنصات المركزية تشكل هاجس لحاملي العملات الرقمية حقاش ايلا شي واحد بغا يبيع البيتكوين خاصو يصيفطو من المحفظة ديالو لحسابو فهاد المنصات قبل مايقوم بعملية التبادل ؤ هادشي خطير حقاش تاتولي هاد المنصات عندها بزاف ديال لفلوس ديال المستخدمين و هو لي تايخليها تكون هدف للقراصنة او مولاها تايبان ليه انو جمع بزاف ديال لفلوس ؤ تايصبح مطرق المحال ؤ شافك شتيه!
كي طرا مؤخرا مع منصة طوديكس التركية لي مولاها طفاها ؤ غبر ؤ دا معاه جوج تالمليار دولار فلوس المستخدمين ديالو...منيار تاينطح منيار ههه بلشفار لاخور
هااا
هنا غادي تجي طورتشين باش تسالي هاد اللعب ؤ غادي تحل باب اخر...
طموح طورتشين هي تكون بورصة العالم لي متايملكها تاواحد اي تا واحد مايقدر يطفيها بوحدو او يشفر المستخدمين ديالها. غادي تقدر تكون منصة للقروض و للتداولات ؤ كاع الخدمات المالية تقنيا يمكن يتدارو فهاد طورتشين... بغض النظر على نوع العملة او البلوكتشين...
ولكن!؟
كاينة واحد نقطة ضعف!
هجوم الاغلبية الساحقة من مشغلي الشبكة ؤ هوما لي تايتسماو الفاليدايتورز او المدقيقين باللغة العربية...
هادو هوما لي تايخدمو الشبكة ؤ تايفاليديو المعاملات او التعاملات لي تا دوز فالشبكة. نفس الدور ديال الماينرز فشبكات البلوكتشين العادية
غادي يتحقق هجوم الاغلبية الساحقة ايلا ناضو ٦٦% منهم ؤ تافقو يطيحو الشبكة راه غادي تكون كارتة على المتداولين لي خدامين تايديرو المعاملات او تايقدمو السيولة للشبكة...
كيفاش؟
شبكة طورتشين تاتخدم ب تلاتة ديال المتدخلين و كلهم مهمين باش النظام يخدم
1 - الفاليدايتورز : هوما لي تايدوزو المعاملات و مسؤولين على الخزنة لي تايحطو فيها مالين السيولة فلوسهم...هاد الفاليدايتورز تايربحو نسبة معينة من الرسوم لي تاتجمع الشبكة مقابل التعاملات
2 - مقدمو السيولة : هادو مالين الشكارة...تايحطو فلوسهم "السيولة" عند الفاليدايتورز مقابل نسبة من الارباح
3- المتداولين : الناس لي تايبيعو ؤ يشريو العملات ؤ هادو تايخلصو الرسوم وتايربح انه تايبيع ؤيشري مباشرة من المحفظة ديالو بلا مايسيفط فلوسو لشي جهة.
هااا
لي تايهمنا حنا هوما الفاليدايتورز حقاش هوما لي يقدرو ينضمو هجوم 66% وحقاش هوما لي تايحميو الخزائن
البلوكتشين العادية فيها هجوم ٥١% ولكن هاد الهجوم معمرو يقدر يحيد ليك البيتكوين ديالك متلا
هجوم 66% ديال طورتشين يقدر يحيد ليك البيتكوين ديالك ايلا كنتي مقدم للسيولة!
علاش؟
طورتشين باش توفر السيولة للمتداولين خلقات نظام تاخليك نتا كصاحب محفظة بيتكوين كبيرة تقدر تحجز البيتكوين ديالك فشبكة طورتشين مقابل تلقي ارباح...علما انه يمكنك سحب اموالك في اي وقت.
الفاليدايتور هو لي تايحمي ليك البيتكوين ديالك فالخزنة...
نعم تايحميهم حقاش ايلا حطيتي نتا مليون دولار ديال البيتكوين هو تايحط تلاتة المليون دولار من عملة الرون "عملة شبكة طورتشين"
بهاد الطريقة نتا تاتكون محمي حقاش ايلا شفرك ليك مليون ديال دولار ديال البيتكوين غادي تمشي ليه هو تلاتة المليون دولار من الرون بطريقة تلقائية كعقاب ليه من طرف النظام ؤغادي يتباع جزئ منو باش يتشرا ليك البيتكوين ديالك...يعني هو غادي يخسر داكشي باش معمرو غادي يفكر يشفرك هو بوحدو لانه سيكون الخاسر الوحيد!
المشكلة هي ايلا تافقات 66% من هاد الفاليدايتورز ؤ دارو هجوم منظم هنا غادي تمشي للناس فلوسها و قيمة الرون غادي تمشي للزيرو !!!!
بالتالي المنفدين ديال الهجوم غادي يستافدو من افشال الشبكة و غادي يجمعو كاع العملات لي كانت فالخزائن لان فهاد الحالة العملة الوحيدة الخاسرة هي الرون و الشبكة لن تستطيع تنفيذ العقود الذكية لان عملة العقود الاساسية اصبحت تساوي الصفر و بالتالي جميع مقدمي السيولة غادي يخسرو فلوسهم الى الابد...
وخا من الصعب يتجمعو 66% من الفاليدايتورز لان اغلبهم غير معروف و بالتالي صعيب التنسيق مدام شي متايعرف شي...
ولكن هادشي متايمنعش ان اي واحد يقدر ينظم للنظام و يعلن على راسو شكون هو يعني مع المدة يقدرو يليو الاغلبية معروفين و يقدرو يشكلو 66% ولا كتر كاع... بحال الابناك صناديق الاستتمار ..الخ الخ
هادو ايلا كان عندهم الربح او دوافع اقتصادية يطفيو الشبكة غادي يطفيوها... و يجمعو حب ؤ تبن...
هاد المشروع زوين بزاف ؤ غادي ينجح بجهد و لكن ايلا المطورين ديالو لقاو شي قالب باش يمنعو هاد النوع من الهجمات انها توقع...
علاش؟
حقاش يلا فات تا وقع هاد الهجوم هاد المشروع غادي يتدفن بمرة...
جبت ليكم هاد التريد من النقاشات لي دايرة فهاد الباب ديال مجتمع المشروع...
تهلاو
تعليقات
إرسال تعليق
Thank you ! your comment will be well displayed.